Campaña do ISSGA para evitar o risco de caídas nas escaleiras

As caídas de altura supoñen un importante número de accidentes laborais e un dos elementos que está presente nalgúns destes accidentes é a escaleira, polo que o Instituto Galego de Seguridade e Saúde Laboral (ISSGA) puxo en marcha a campaña: "Non caia da escaleira".

Esta actuación desenvolveuse dentro do grupo de traballo de sinistralidade do Consello Galego de Seguridade e Saúde Laboral e a súa finalidade é informar sobre os criterios de selección das escaleiras, as medidas preventivas antes da súa utilización, a súa correcta colocación e utilización, as indicacións para o seu traslado e almacenamento e os EPI que se utilizarán. Deste xeito, preténdese reducir os accidentes laborais derivados de caídas de altura cando se realizan traballos nos que se utilizan escaleiras.

Entre os materiais que se elaboraron, hoxe presentamos un tríptico e un documento técnico que desenvolven todas as cuestións antes mencionadas.