Métodos de avaliación de riscos derivados da manipulación de carga
O INSST vén de publicar o documento técnico titulado: "Métodos de avaliación de riscos derivados da manipulación manual de cargas".
O obxectivo fundamental deste traballo é presentar os principais métodos de avaliación dos riscos derivados da manipulación manual de cargas e determinar cal é o máis axeitado segundo as distintas situacións de manipulación que se poidan atopar no ámbito de traballo.
O autor lembra que a manipulación manual de cargas é unha tarefa que está presente en multitude de sectores produtivos e hai profesións nas que esa manipulación pode supoñer un risco para a saúde e a seguridade. Pode provocar fatiga física ou trastornos musculoesqueléticos (TME), ademais da exposición a outros riscos como caídas ao mesmo nivel, cortes, golpes ou caída de obxectos e tamén está moi relacionada cos accidentes por sobreesforzos.
Todo isto fai que a prevención de riscos derivados da manipulación manual de cargas teña unha especial importancia na estratexia preventiva que deben desenvolver as empresas.
