Chega o verán e chegan as viaxes. Nova infografía sobre os efectos da calor na condución.

Chegou o verán, as merecidas vacacións, os desprazamentos en vehículos e as altas temperaturas. A calor é un factor de risco que hai que ter en conta en todos os traballos.

Este ano temos unha importante novidade, xa que o Real Decreto-Lei 4/2023  obriga a adoptar medidas de protección dos traballadores contra a calor, chegando incluso a prohibir o traballo ao aire libre cando a AEMET - Axencia Estatal de Meteoroloxía establece un nivel laranxa ou vermello. Ademais, nesta mesma liña, o INSST, Instituto Nacional de Seguridade e Saúde no Traballo, vén de poñer en marcha a campaña "CO SOL É UN MOMENTO DE PREVENCIÓN".

Desde o punto de vista da seguridade viaria, non todas as persoas que toman o control dun vehículo son conscientes do risco que supón conducir a altas temperaturas. Cal é a temperatura recomendada dentro do vehículo antes de comezar a viaxe? Cales son as horas máis calorosas do día e por que se recomenda evitar conducir a esa hora? Que riscos poden xurdir cando se conduce con temperatura excesiva e como afecta ás nosas capacidades físicas e comportamento?

Nesta nova infografía atoparás as respostas con consellos que che axudarán a conducir con seguridade nos días de calor.