"ESPAÑA É UN DOS PAÍSES MÁIS RICOS DE EUROPA EN BIODIVERSIDADE". 2010 Ano da Diversidade Biolóxica.

SEO/BIRDLIFE e WWF PRESENTAN OS 10 OBXECTIVOS PARA MELLORAR A BIODIVERSIDADE

Seis meses despois do inicio do Ano Internacional da Biodiversidade, proclamado pola ONU, as dúas organizacións ecoloxistas introducen os obxectivos necesarios para frear a alarmante perda de biodiversidade, apoiados nun novo plan de acción a nivel europeo.

Estímase que a taxa de extinción actual é ata 1.000 veces superior á taxa natural, o que se traduce en que entre 18.000 e 55.000 especies desaparecen da faz da terra cada ano. Esta perda coñécese como a Sexta Extinción, a primeira causada pola acción humana. Os bosques ocupan actualmente a metade da superficie que facían hai só 8.000 anos. Só na última década produciuse unha perda de superficie forestal de case 100 millóns de hectáreas ao ano, o equivalente a 5 millóns de campos de fútbol.

España é un dos países europeos máis ricos en biodiversidade, con 85.000 especies de fauna e flora, o 54% do total de especies europeas. Por desgraza, España tamén sofre o mesmo proceso que afecta a outros lugares do planeta e nos últimos cen anos extinguíronse polo menos 17 especies animais e 24 vexetais. As especies declaradas en perigo de extinción duplicáronse nos últimos 25 anos, afectando en moitos casos a animais tan emblemáticos como o lince ibérico, a aguia imperial ou o oso pardo.

Son cinco as principais ameazas que provocan esta situación: a destrución e degradación dos hábitats, as especies invasoras, a sobreexplotación dos recursos, a contaminación e os efectos do cambio climático.

A UE comprometeuse a deter a perda dos nosos recursos naturais para 2010. Porén, ata a data, ningún dos obxectivos propostos se conseguiu.

O Consello de Medio Ambiente adoptou o pasado mes de marzo un novo obxectivo para o ano 2020. Neste período os gobernos membros deben avanzar cara a un crecemento económico sostible que non poña en perigo os nosos recursos naturais, recuperar zonas actualmente degradadas e garantir o futuro do ser humano, algo que depende directamente da boa saúde do resto das especies e espazos do planeta. Para SEO/BirdLife e WWF, é moi importante que as actividades humanas e a natureza convivan en harmonía e non como rivais.

Os 10 obxectivos para mellorar a biodiversidade

• 1. Aplicar plenamente as Directivas de Aves e Hábitats, incluíndo a designación da Rede Natura 2000 e a aprobación de obxectivos de conservación e plans de xestión de todos os lugares da Rede, incluídos os mariños.
• 2. Aplicar de forma completa e correcta as Directivas Marco da Auga e da Estratexia Mariña, así como os de Avaliación de Impacto Ambiental, Responsabilidade Ambiental e Delitos Ambientais.
• 3. Reformar as políticas sectoriais comunitarias para que contribúan á conservación da biodiversidade e dos ecosistemas, eliminando as subvencións perversas, en particular, nas políticas agrarias e pesqueiras.
• 4. Aprobar a nova lexislación sobre especies exóticas invasoras, protección do solo, rexións ultraperiféricas e tala ilegal de bosques.
• 5. Aumentar a proporción do orzamento comunitario dedicado á biodiversidade.
• 6. Afondar na valoración dos servizos dos ecosistemas, recollendo as recomendacións do informe TEEB (The Economic of Ecosystem and Biodiversity). Establecer límites no uso dos recursos naturais, da enerxía e do espazo, integrando o obxectivo de biodiversidade na Estratexia UE 2020.
• 7. Conseguir a neutralidade en carbono e desenvolver e financiar medidas de adaptación e mitigación baseadas nos ecosistemas, tanto en Europa como en terceiros países.
• 8. Reducir a pegada ecolóxica dos países europeos, controlando o consumo de materias primas como madeira, peixe e, sobre todo, combustibles fósiles.
• 9. Desenvolver unha estratexia de uso sostible do territorio baseada na ordenación do territorio, que evita a fragmentación dos hábitats pola urbanización e a construción de infraestruturas.
• 10. Establecer límites no uso dos recursos naturais, da enerxía e do espazo, integrando a rede de biodiversidade na Estratexia UE 2020.