Guía de saúde integral e benestar laboral nas pemes
O Instituto de Seguridade e Saúde Laboral de Galicia presentou a pasada semana unha nova publicación titulada: "Saúde integral e benestar laboral nas pemes" que pretende servir de orientación para o desenvolvemento de programas e actuacións neste ámbito dentro das pequenas e medianas empresas.
Este documento busca abordar retos como o absentismo laboral así como outras cuestións relacionadas coa produtividade e o estrés no traballo. De feito, esta publicación aborda temas como os programas de reincorporación ao traballo tras unha situación de baixa e os programas de saúde e benestar, nos que se inclúen suxestións de elementos fundamentais a ter en conta como a promoción de prácticas e hábitos saudables, a posta en marcha de campañas de saúde, programas que faciliten a conciliación da vida laboral e familiar.
Na guía tamén se destacan os beneficios da implantación de programas de saúde e benestar no traballo, como mellorar a saúde dos traballadores, aumentar a produtividade e retención de talento ou mellorar o ambiente laboral, entre outros. Inclúe tamén aspectos relacionados co benestar profesional, físico, psíquico e emocional, familiar e social e económico, contén exemplos de actuacións que resultaron eficaces nas empresas en materia de seguridade e saúde no traballo e consellos para a xestión do estrés, pautas para promover unha alimentación saudable nunha peme ou accións para fomentar a práctica habitual de exercicio físico.
