Presentación da Estratexia Española de Seguridade e Saúde no Traballo, 2023-2027
O Ministerio de Traballo e Economía Social presentou a pasada semana o acordo alcanzado para a Estratexia Española de Seguridade e Saúde no Traballo 2023-2027, consenso que contou coa participación dos principais interlocutores e axentes sociais e representantes das Comunidades Autónomas.
.Co obxectivo de acadar a maior eficacia posible na mellora das condicións de seguridade e saúde no traballo e tratar de prever e xestionar as posibles ameazas e riscos para a saúde dos traballadores que se xurdan co cambiante mundo do traballo, a Estratexia desenvolveuse arredor de seis obxectivos estratéxicos:
- Mellorar a prevención de accidentes de traballo e enfermidades profesionais.
- Xestionar os cambios derivados das novas formas de organización do traballo, a evolución demográfica e o cambio climático.
- Mellorar a xestión da seguridade e saúde nas pemes, unha aposta pola integración e a formación en prevención de riscos laborais.
- Reforzar a protección dos traballadores en situacións de maior vulnerabilidade.
- Introducir a perspectiva de xénero no ámbito da seguridade e saúde no traballo.
- Reforzar o sistema nacional de seguridade e saúde laboral para afrontar con éxito futuras crises.
En torno a estes seis obxectivos elaboráronse liñas de actuación, consensuadas polas administracións públicas e os axentes sociais e adoptadas pola Comisión Nacional de Seguridade e Saúde no Traballo.
No que respecta á prevención de accidentes de traballo, unha das actuacións que incorpora a estratexia é afondar na investigación das causas que provocan accidentes laborais mortais por patoloxías non traumáticas, que representan o 40% dos accidentes mortais, co obxectivo de perfilar políticas preventivas eficaces.
Elaboraranse pautas para informar sobre estilos de vida, factores biomédicos e estresores laborais que aumentan o risco cardiovascular e as súas estratexias de prevención. Ademais, incidirase nas actividades profesionais que acumulan maior porcentaxe de accidentes de traballo para intensificar as campañas de asistencia técnica e de vixilancia e control do cumprimento da normativa en coordinación coa Inspección de Traballo e Seguridade Social e as administracións públicas.
Entre as novidades da estratexia, destaca a creación da Axenda Nacional de Prevención do Cancro Laboral, que permitirá avanzar na mellora da identificación das enfermidades profesionais mediante a recompilación de accións para comprender a situación actual do cancro laboral no país.
Dada a transformación dixital e ecolóxica e o cambio demográfico que se está a producir, revisarase a Lei de Prevención de Riscos Laborais e o Regulamento dos Servizos de Prevención, para incorporar a integración da idade e a diversidade xeracional na xestión preventiva e reforzar a protección dos traballadores fronte aos riscos psicosociais.
Do mesmo xeito, apoiarase ás empresas para identificar e avaliar os riscos derivados da dixitalización e das novas formas de emprego, como o seguimento das condicións de seguridade e saúde das persoas que se dedican á entrega ou distribución de todo tipo de mercadorías.
Tamén se impulsarán plans de actuación para mellorar e controlar as condicións de traballo nas actividades máis afectadas polos cambios ambientais.
Outro destacado é que, por primeira vez, se dedica especial atención á saúde mental con plans específicos de identificación, avaliación e prevención de riscos psicosociais en actividades con maior prevalencia de enfermidades mentais, entre outras actuacións. Tamén se recoñecerán as empresas que acrediten boas prácticas na xestión da saúde emocional e na prevención de enfermidades mentais.
