Seguridade e Saúde Laboral dentro do Plan Estratéxico da Inspección de Traballo e Seguridade Social 2025-2027
O 12 de setembro, o Boletín Oficial do Estado publicou a Resolución do 8 de setembro de 2025, da Secretaría de Estado de Traballo, pola que se publica o Acordo do Consello de Ministros do 26 de agosto de 2025 polo que se aproba o Plan Estratéxico da Inspección de Traballo e Seguridade Social 202TAG______HTML-2022725.
O plan conta cun primeiro eixo que abrangue dez obxectivos e define as liñas de actuación prioritarias nos diferentes ámbitos nos que desenvolve a súa actividade esta organización, entre as que se atopa a seguridade e a saúde no traballo.
Así, o obxectivo 3 sinala que este Plan Estratéxico debe estar aliñado coa Estratexia Española de Seguridade e Saúde no Traballo 2023-2027 e que está chamado a converterse no instrumento máis eficaz para executar a Estratexia Española, naqueles aspectos que afecten á Inspección de Traballo e Seguridade Social. Neste plan hai que conxugar dúas vertentes: a loita contra os accidentes máis graves, que se seguen producindo en sectores como a construción, a agricultura, a pesca ou a distribución de mercadorías, e, por outra banda, os novos postos de traballo e formas de traballo que entrañan riscos novos e emerxentes.
Establecen a necesidade de adoptar novos enfoques, como a incorporación da perspectiva de xénero na seguridade e saúde laboral, así como a atención aos riscos e danos existentes para a saúde, especialmente os relacionados coa exposición a riscos psicosociais. Todo isto requirirá unha maior atención da Inspección de Traballo e Seguridade Social, así como dos axentes implicados na prevención de riscos laborais en xeral.
Os puntos nos que se centrarán as súas accións dentro deste obxectivo xeral son:
- Liña 3.1 Prevención de accidentes de traballo e enfermidades profesionais nos sectores de maior sinistralidade.
- Liña 3.2 Contribuír á prevención do cancro laboral.
- Liña 3.3 Anticipar os riscos derivados das transicións.
- Liña 3.4 Promover accións de información e asistencia técnica en materia de seguridade e saúde.
