Fraternidad-Muprespa e ONCE colaboran para fomentar a inserción laboral de persoas con discapacidade

A Mutua Colaboradora coa Seguridade Social Fraternidad-Muprespa asinou o convenio Inserta o día 7 de febreiro en Madrid, coa finalidade de facilitar a inserción laboral de 15 persoas con discapacidade na Mutua durante os tres próximos anos.

O acordo, subscrito polo director xerente de Fraternidad-Muprespa, Carlos Aranda e o vicepresidente executivo de Fundación ONCE, Alberto Durán, enmárcase no programa operativo de Inclusión Social e da Economía Social (POISES), que está a desenvolver a Fundación ONCE a través de Inserta Empleo co cofinanciamento do Fondo Social Europeo, co obxectivo de incrementar a formación e o emprego das persoas con discapacidade.

A secretaria e directora xeral de Inserta Empleo Virginia Carcedo, inaugurou o acto comentando que “Fraternidad-Muprespa leva dende 1929 xestionando accidentes de traballo e destacou as sinerxías que se poden producir entre Inserta e a Mutua polas discapacidades sobrevidas dun accidente laboral e a prevención de riscos laborais”.

Segundo explicou Carlos Aranda “Fraternidad-Muprespa dedicou este ano 2017 á integración de persoas con discapacidade e coa sinatura deste convenio, damos un paso de xigante para reforzar a RSC da nosa Mutua, podendo avanzar neste proxecto tan ilusionante”.

Pola súa parte, Alberto Durán asegurou que "estamos moi contentos de colaborar con Fraternidad-Muprespa, sobre todo ao ser unha das Mutuas Colaboradoras coa Seguridade Social, esas grandes descoñecidas... Grazas a Inserta poderemos realizar proxectos en común que dean visibilidade a ambas as dúas entidades, abríndose un mundo de posibilidades para as persoas con discapacidade”.

Fraternidad-Muprespa contará con Inserta, entidade para a formación e o emprego de Fundación ONCE, para abordar os procesos de selección de candidatos para postos de traballo que poidan necesitar as empresas do grupo, así como para desenvolver posibles accións de formación e cualificación profesional.