Estar alerta, pero non alarmados, a causa do COVID-19
Dada a situación mundial creada a causa do coronavirus COVID-19, e tras os primeiros casos positivos en España, debemos estar informados e coñecer ben as pertinentes medidas preventivas sen incorrer en alarmismos. O Ministerio de Sanidade, Consumo e Benestar Social encóntrase en permanente contacto cos organismos internacionais: Organización Mundial da Saúde e o Centro Europeo para a Prevención e o Control de Enfermidades (ECDC), para avaliar riscos e coordinar as medidas de resposta.
Ademais, o Ministerio inclúe no seu portal web actualizacións constantes de datos de interese, así como consellos preventivos, preguntas frecuentes e desmentidos de noticias falsas que pode coñecer premendo nas ligazóns que poñemos á súa disposición. Aquí imos resumir algúns deles:
- Manter unha boa hixiene xeral é clave. Hai que lavar frecuentemente as mans, tanto para evitar este virus como outros máis comúns como, por exemplo, a gripe.
- Evitar tocar o nariz ou a boca. Se espirramos, tapar boca e nariz coa parte interior do cóbado. É importante tamén desbotar os panos unha vez usados.
- Vixiar os nosos síntomas. Os máis comúns son febre, tose e sensación de falta de aire. Nalgúns casos tamén pode haber síntomas dixestivos, como diarrea e dor abdominal.
- Adoptar precaucións se estivemos en zonas de risco. Hai que levar unha vida normal, pero sendo conscientes do noso estado de saúde. Se se presentan síntomas como os descritos anteriormente, debemos permanecer no noso domicilio ou aloxamento e poñernos en contacto telefónico co 112.
España dispón de mecanismos abondo de contención, que inclúen protocolos clínicos, unha rede asistencial e de saúde pública coordinada e capacidade suficiente para o diagnóstico e tratamento dos casos.
Suxerimos a todos os lectores que se manteñan informados a través de canles oficiais, por exemplo, consultando os perfís de redes sociais de Fraternidad-Muprespa (Twitter e Facebook), nos que difundimos a información de interese que proporciona o Ministerio de Sanidade.